|
Қазақстан Республикасының Цифрлық даму, инновациялар және аэроғарыш өнеркәсібі министрі Жаслан Мәдиев Meta компаниясының вице-президенті доктор Саймон Милнермен кездесу өткізді. Кездесу барысында жасанды интеллектіні дамыту, кадрларды даярлау, киберқауіпсіздік мәселелері және балаларды қорғау цифрлық қауіпсіздігін қамтамасыз ету жайы талқыланды. Meta бастамасы аясында Maqsut Narikbayev University қабырғасында мемлекеттік органдар, академиялық қауымдастық, қоғамдық ұйымдар және жастар өкілдерінің қатысуымен сала үшін маңызды іс-шара өтті. Онда кибербуллингтің алдын алу шаралары, зиянды контентке қолжетімділікті шектеу, сондай-ақ жасөспірімдердің құқықтары мен жеке шекараларын құрметтейтін онлайн-бақылау тетіктерін дамыту мәселелері қарастырылды. Meta компаниясы 16 жасқа дейінгі пайдаланушыларға арналған жаңа Instagram функциясы — «Жасөспірімдерге арналған аккаунттарды» таныстырды. Бұл функция аясында ата-аналар жасөспірім аккаунтына қол жеткізе алатын адамдар аясын шектей алады; сезімтал контентті сүзгілеу мүмкіндігі бар; пікірлер мен хабарламаларда қорлайтын сөздерді автоматты түрде бұғаттау жүзеге асырылады; жарияланымдарды бейтаныс қолданушылардан жасыруға, түнгі уақытта хабарламалар туралы ескертулерді өшіруге және пайдалану уақытын шектеуге болады. Бұл функция халықаралық зерттеулер мен ата-аналардың сараптамалық ұсыныстары негізінде әзірленген. Жақын арада бұл мүмкіндік Қазақстандағы пайдаланушылар үшін қолжетімді болады деп күтілуде. Министр Жаслан Мәдиев ведомство азаматтардың, әсіресе балалардың мүддесіне қызмет ететін қауіпсіз әрі этикалық цифрлық ортаны қалыптастыру бағытында жүйелі жұмыс жүргізіп жатқанын атап өтті.
ҚР ЦДИАӨМ Баспасөз қызметі |
|
Ардақты ағайын! Құрбан айт мерекесі құтты болсын! Барша мұсылман қауым үшін қасиетті саналатын бұл мейрам – имандылық пен ізгіліктің символы. Айт күндері мұқтаж жандарға жақсылық жасап, көмек көрсету – ата-бабаларымыздан жалғасып келе жатқан игі дәстүр. Асыл дініміз азаматтарды бір-бірін құрметтеуге, жақындарына жанашыр болуға үндейді. Бауырластық пен сыйластықты дәріптейді. Халқымыздың берекелі бірлігі осындай ізгі құндылықтардың арқасында нығая түседі. Құрбан айт – ырысты ынтымақтың мерекесі. Біз еліміздегі тұрақтылықтың қадірін біліп, татулықты сақтау арқылы кез-келген сыннан сүрінбей өтіп, биік мақсаттарға жетеміз. Әділетті, Таза, Қауіпсіз әрі Қуатты Қазақстанды бірге құрамыз. Құрбан айт кезінде айтылар дұға-тілектер қабыл болсын! Әр шаңыраққа құт-береке қонсын! Айттан айтқа аман-есен жете берейік! |
|
Бангкок, 2025 жылғы 22 мамыр – Таиланд Корольдігінің Үкімет үйінде Қазақстан Республикасы Цифрлық даму, инновациялар және аэроғарыш өнеркәсібі министрлігі мен Таиланд Корольдігінің Цифрлық экономика және қоғам министрлігі арасында цифрлық және ақпараттық технологиялар саласындағы ынтымақтастық туралы өзара түсіністік жөніндегі Меморандумға қол қою рәсімі өтті. Рәсімге Қазақстанның Елшісі Арман Исетов пен Таиландтың Премьер-Министрінің орынбасары – Цифрлық экономика және қоғам министрі Прасит Чантаравонгтонг қатысты. Құжатқа қол қойылуы жоғары технологиялар саласындағы екіжақты ынтымақтастықты нығайту жолындағы маңызды қадам болды. Рәсім барысында Елші А. Исетов цифрландыру кез келген ел экономикасының негізгі элементі екенін атап өтті. Оның айтуынша, цифрлық даму – бұл жай ғана үрдіс емес, бұл – экономикалық тұрақтылыққа, ұлттық бәсекеге қабілеттілікке және азаматтардың өмір сапасына тікелей әсер ететін стратегиялық басымдық. Қол қойылған құжат аясында Қазақстан мен Таиландтың бірлескен күш-жігері ақпараттық технологияларды қолданудағы озық тәжірибе алмасу, электрондық денсаулық сақтау, қашықтан оқыту және цифрлық мемлекеттік қызметтер көрсету салаларында кең мүмкіндіктерге жол ашады. Сонымен қатар, IT-парктер, академиялар және инновациялық орталықтар арасындағы байланыстарды кеңейтуге ықпал етеді. Аталған құжат екі елдің инновациялар, білім және технологиялар негізіндегі орнықты цифрлық болашақ құруға деген ұстанымын көрсетеді. Ақпарат көзі: Қазақстан Республикасының Таиланд Корольдігіндегі Елшілігі https://www.gov.kz/memleket/entities/mfa-thailand/press/news/details/1001995?lang=kk |
|
Ең ірі онлайн-хакатон табысты аяқталды: 1349 команда 16 миллион теңге жүлде қоры үшін жарысқа түсті.  Үш күнге созылған халықаралық хакатон Decentrathon 3.0 нағыз жаһандық деңгейдегі технологиялық оқиғаға айналды. Қарқынды жұмыс барысында іс-шара әлемнің 19 еліндегі 2670 қатысушынының басын қосты, олар жасанды интеллект және геймджем саласында инновациялық шешімдер жасау үшін 1300-ден астам команда құрды. Хакатонның географиялық ауқымы кең: Қазақстан, Ресей, Германия, Түркия, Өзбекстан, Малайзия, Испания, Грузия, Тәжікстан, Әзербайжан, Венгрия, Австрия, Армения, Израиль, Қырғызстан, Сербия, Оңтүстік Корея, Румыния және Вьетнамнан командалар қатысты. Бұл Decentrathon-ды аймақтағы жетекші технологиялық оқиғалардың бірі ретінде айшықтады. Хакатонды Decentra платформасында онлайн-форматта өткізу қатысушыларға өз жобаларын ыңғайлы ортада жүзеге асыруға мүмкіндік берді. Ұйымдастырушылар үш күн бойы командаларға техникалық қолдау көрсетті. «Decentrathon – ең алдымен адамдар туралы. Бұл – ауқымды істің бөлігі болғысы келетін, бірлесіп дамуға және жаңалық ашуға ұмтылатын жандар жайлы. Хакатон ғана емес, әркім өз идеясын ортаға салып, бір толқында жұмыс істей алатын қауымдастық», — деді Blockchain and AI Technology Center жетекшісі Айдана Қасқырбек. Kazakhtelecom, activ 5G және Mastercard серіктестігімен іске асырылған AI-тректің "Креативтегі AI" арнайы бағыты қатысушылардың ерекше назарын аударды. Бағдарламалау дағдыларын қажет етпейтін бұл трек шығармашылық тұлғаларға заманауи AI құралдарын пайдалана отырып, бірегей шешімдер жасауға мүмкіндік берді. Ал Grand Mobile серіктестігімен әзірленген GameJam қатысушылардың ойын прототиптерін жасау және инновациялық ойын механикаларын әзірлеудегі белсенділігін көрсетті. Decentrathon 3.0-дің табысы инклюзивті технологиялық платформа құру стратегиясының дұрыстығын растады. Цифрлық даму, инновация және ғарыш өнеркәсібі министрлігінің қолдауымен Astana Hub және Blockchain and AI Technology Center ұйымдастырған іс-шара заманауи технологиялардың географиялық шектерге қарамастан, адамдарды қалай біріктіре алатынының мысалы болды. Decentrathon 3.0-дің халықаралық табысы жобаны одан әрі дамытуға арқау болды. Ұйымдастырушылар жаһандық технологиялық қауымдастықтың сұранысын және халықаралық әріптестік тәжірибесін ескере отырып, басқа да іс-шараларды жүзеге асыруға ден қойды. https://astanahub.com/ru/article/decentrathon-3-0-obedinil-2670-uchastnikov-iz-19-stran-mira |
|
GITEX Central Asia & Caucasus x Ai Everything Kazakhstan атты алғашқы шара 2026 жылдың 2-4 маусымында Астанада өтеді. Іс-шараны Қазақстан Республикасының Цифрлық даму, инновациялар және аэроғарыш өнеркәсібі министрлігі Astana Hub-пен серіктестікте ұйымдастырады. GITEX Central Asia & Caucasus x Ai Everything Kazakhstan жыл сайынғы тұрақты шараға айналады. Форумды өткізу жаһандық GITEX қаражаты есебінен жүзеге асырылады. Орталық Азия мен Кавказ — әлемдегі ең жылдам дамып келе жатқан цифрлық өңірлердің біріне айналуда. Дүниежүзілік банктің бағалауынша, 2025–2026 жылдары өңір елдерінің ЖІӨ-сі шамамен 4,7%-ға өседі. Өткен жылы венчурлік қаржыландыру аймақта күрт артып, 95 миллион АҚШ долларына жетті. Тек IT-қызметтер нарығының өзі 2029 жылға қарай 5,6 миллиард АҚШ долларына дейін өседі деп күтілуде. Осы үрдіс аясында өңірде талантты әзірлеушілер мен IT-мамандардың жаңа буыны қалыптасып келеді, ал өңір елдерінің үкіметтері цифрландыруға мемлекеттік қызметтерден бастап қаржы мен энергетика сынды маңызды салаларға дейін жаңа серпін беруде.Мұның бәрі өңірді жаһандық инновациялық күн тәртібінде алдыңғы қатарға шығаруда. Осы цифрлық дамудың тартылыс орталығына айналған — Қазақстан. Мұнда Орталық Азиядағы ең ірі гипермасштабты деректер орталығы орналасқан, мемлекеттік қызметтердің 90%-ы цифрланған, сондай-ақ Alem.ai халықаралық жасанды интеллект орталығы секілді флагмандық халықаралық жобалар іске қосылған. Дәл осы контексте Қазақстан әлемдегі ең ірі технологиялық және стартап-іс-шара — GITEX Central Asia & Caucasus x Ai Everything Kazakhstan форумын қабылдайды. Форум 2026 жылғы 2–4 маусым аралығында Астанада өтеді. Форумның өтетіні туралы ресми хабарлама Берлинде өткен GITEX EUROPE x Ai Everything көрмесінің бірінші күні жарияланды. GITEX Central Asia & Caucasus x Ai Everything Kazakhstan көрмесін әлемдегі ең ірі технологиялық және стартап-қауымдастық GITEX аясында KAOUN International компаниясымен ұйымдастырылады. Шараны Қазақстан Республикасының Цифрлық даму, инновациялар және аэроғарыш өнеркәсібі министрлігі Astana Hub-тың қолдауымен өткізеді. Бұл іс-шара Орталық Азия мен Кавказдағы жасанды интеллект, деректер орталықтары, киберқауіпсіздік, бұлтты шешімдер, FinTech, стартаптар және deep-tech салаларында тәжірибе алмасу мен инвестиция тартуға арналған ең ірі алаңға айналады. Қазақстан GITEX жаһандық маршрутының тоғызыншы нүктесіне айналды. Берлин, Марокко, Нигерия, Сингапур, Таиланд, Абу-Даби, Дубай және Вьетнам сынды елдерден кейін Қазақстан GITEX жаһандық технологиялық және стартап платформасының тоғызыншы нүктесі болып отыр. Бұл трансшекаралық, көпсалалы платформа инновациялық компанияларға жаһандық нарықтарға, инвестицияларға және таланттарға тікелей қол жеткізуге мүмкіндік береді. Цифрлық даму, инновациялар және аэроғарыш өнеркәсібі министрі Жаслан Мәдиев: «Бұл – Қазақстанның жаһандық цифрлық инновациялар орталығы болуға бағытталған жолындағы маңызды қадам. Жасанды интеллектіні интеграциялау, таланттарды дамыту, стартаптарды қолдау және халықаралық ынтымақтастық – бұлардың барлығы GITEX философиясымен үндес біздің көзқарасымыз бен құндылықтарымызды көрсетеді. Бізді ортақ цифрлық мақсат пен технологиялық озық әрі гүлденген болашаққа деген ұмтылыс біріктіреді. Бұл әріптестік Қазақстан мен бүкіл өңір үшін зор мүмкіндіктерге жол ашады». БАӘ инвестициялар жөніндегі вице-министрі Мұхаммед Альхауи: «Цифрлық бәсекеге қабілеттілік – БАӘ-нің басымдық беретін стратегиялық бағыттарының бірі. Екіжақты сауда серіктестіктері мен технологиялық ынтымақтастық – бұл саясаттың өзегі. CEPA шеңберіндегі келісімдер мен ЕАЭО-мен цифрлық диалогтың жеделдеуі осы ұстанымның дәлелі. Астанада жасанды интеллект пен дата-орталықтарға инвестициялар бойынша қол қойылған келісім – ашылып жатқан мүмкіндіктердің ауқымын нақты көрсетеді. Қазақстанда GITEX Central Asia & Caucasus көрмесінің іске қосылуы – инновацияларға негізделген, инфрақұрылыммен күшейтілген және жасанды интеллект, киберқауіпсіздік, деректер мен стартаптар салаларындағы шексіз әлеуетпен алға жетелейтін өңірлік альянстың қалыптасуындағы маңызды кезең». KAOUN International компаниясының бас директоры және GITEX жаһандық ұйымдастырушысы Dubai World Trade Centre-дің атқарушы вице-президенті Трикси Ло Мирманд: «Central Asia & Caucasus өңірі ресурстар дәуірінен инновациялар мен жасанды интеллект басымдық алатын дәуірге көшіп жатыр. Қазақстан бұл үдерісте алдыңғы қатарда келе жатыр және өңірлік цифрлық бірлестікті қайта қалыптастыру стратегиясы арқылы көшбасшылықты қолға алуда. Астанада GITEX өткізу осы өршіл бағытты жаһандық капитал, код және таланттар желісімен тікелей байланыстырады. Прогрессивті саясат, инфрақұрылымды жедел жаңғырту және ұлттық цифрлық жобалардың легі – әлемдік технология қауымдастығына GITEX Central Asia & Caucasus алаңында танысуға мүмкіндік беретін тарихи сәтті қалыптастырып отыр». Astana Hub бас директоры Магжан Мәдиев өз сөзінде: «GITEX – бүкіл әлемде технологиялық индустрия өкілдерін біріктіретін, цифрлық алшақтықты азайтатын, серіктестікті нығайтатын және маңызды цифрлық салаларда ынтымақтастыққа шабыттандыратын платформа ретінде танымал. Біз GITEX 2026 жылдан бастап Қазақстанда ресми түрде басталатынына қуаныштымыз. Қазірдің өзінде серіктестермен бірге бұл жаһандық тех-шоудың қазақстандық нұсқасын жоғары жетістіктердің синониміне айналдыру үшін жұмыс істеп жатырмыз. Бұл шара еліміздің цифрлық экономикасын онжылдықтар бойы ілгерілететін басты катализатор болады деп сенеміз». Орталық Азиядағы технологиялық дамудың катализаторы GITEX Central Asia & Caucasus x Ai Everything Kazakhstan жасанды интеллект саласының көшбасшыларын, деректер орталықтарының сәулетшілерін, киберқауіпсіздік мамандарын, FinTech жаңашылдарын және өңірдегі ең перспективалы стартаптарды біріктіреді. Олар жаңа даму серпінін қамтамасыз ететін технологияларды әзірлеу және енгізу үшін бас қосады. Қатысушылар GITEX-тің жаһандық желісіне — инвесторлардан бастап стартаптар мен мемлекеттік реттеушілерге және бизнес өкілдеріне дейін — тікелей қол жеткізеді. Бұл көрмеде ұсынылған идеялардың нақты пилоттық жобалар мен масштабталатын шешімдерге жедел көшуіне мүмкіндік береді. Қазақстан цифрлық серпіліс жолында Қазақстан Үкіметі 2026 жылға дейін барлық мемлекеттік қызметтерді онлайн форматқа көшіруді және өнеркәсіптік-қаржылық операциялардың 70%-ын автоматтандыруды жоспарлап отыр. Бүгінде Қазақстан БҰҰ-ның онлайн-қызметтер рейтингінде үздік ондыққа енген, ал Жасанды интеллект енгізуге дайындық индексі бойынша Орталық Азияда 1-орында тұр. Елдегі венчурлік инвестициялар көлемі 71 миллион долларға жетті, ал Астанадағы alem.ai орталығы 2029 жылға дейін жасанды интеллект өнімдерінің экспортын 5 миллиард долларға дейін ұлғайтуды көздеп отыр. Бұл — технологияларды импорттаудан олардың ауқымды экспортына көшу кезеңі. БАӘ-мен стратегиялық әріптестікті дамыту GITEX Астана мен Абу-Даби арасындағы инновациялық дәлізді нығайтады. Биыл БАӘ инвестициялар министрі Қазақстанға сапармен келіп, жасанды интеллект және деректер орталықтары бойынша стратегиялық келісімге қол қойды. Бұдан кейін Абу-Дабиден келген Presight компаниясы Орталық Азиядағы алғашқы кеңсесін Астанада ашып, өңірдің ЖИ әлеуетін арттыруға кірісті. Бұл бастамалар БАӘ мен ЕАЭО арасындағы жан-жақты экономикалық әріптестік туралы келіссөздермен қатар жүзеге асуда. GITEX Central Asia & Caucasus x Ai Everything Kazakhstan осы жоғары деңгейдегі келісімдерді нақты бірлескен жобаларға айналдырады. Ол Парсы шығанағы елдерінің капиталы мен тәжірибесін Орталық Азия инженерлік әлеуетімен біріктіре отырып, цифрлық өсімнің жаңа қозғалтқышын қалыптастырады. |
